Antje de Musical
Wieërt weurtj weer wakker!
2014: Op ‘nne bomvolle mêrrentj maaktj Wieërt kinnis mét ‘de spektakelmusical’. Bekindje popnummers vörzeen van eigetiêdse dialecttekste di-j, same met de verbingendje tekste van verteller Ton Adriaens, ’t verhaol brînge van Jan & Mieke in ’Rogstaekers de Legende’.
2018: Daezelfdje mêrrentj és ’t tenieël vör ‘ne fônkelnowwe knaller! Oeëze eige Wieërter hêldj Philps de Montmorency keumptj tot laeve in ‘Graaf van Horne-de Musical’ en Wieërt és lyrisch oeëver dét waat d’r geboeëje weurtj.
2024: Mér ’t kân nog groeëter, nog schoeëner! ’t Wachte weurtj beloeëndj. Vae verhoêze nao ’t Statieplein dét in z’n gehieël komplieët met de statie ’t tenieël vormtj vör…. ‘Antje- de Musical’
En neme uch me-j nao 30 oktoeëber 1913 as de ieërste stoumtrein uut Eindhove via ’t spoeër oppe statie in Wieërt binne dênderdj en dêndere zoeë-mer doeër de tiêd nao 2020 corona. ’n Verhaol oeëver Wieërt, oongersnemerschap en alles woeë Wieërt gruuëts op és .
Vae zeen bli-j det vae uch kunne aankondige det vae drök doondje zeen mét de vuuërbereî-jinge van ‘ne nowwe musical op 17, 18 en 19 mei 2024 op ’t plein beej de stâsie “ANTJE de MUSICAL”.
Wieërt weurtj weer wakker! Zeejjae d’r beej?!
Audities ‘Antje-de Musical
Theater de Huiskamer waas zaoterdag 11 mieërt ‘t tenieël vör de ieërste audities van ‘Antje-de Musical’. Nao ‘n vuuërselectie wore 12 auditânte uutgenuuëdj um eur zangtalênt te laote beoeërdaele doeër ‘t artistieke team vanne musical. Om dudelik te make det de stichting Wieërt Amezieërtj de zaak serieus wiltj aanpakke waas Rob Mennen, muzikaal leider van de professionieël musicalproductie ‘Dagboek van een Herdershond’, uutgenuuëdj um ‘t team te ongerstuuëne.
‘t Team waas good te spraeke oeëver ‘t regionaal talênt det de stoute schoon haaj aangetrokke um, toch wat zieënewechtig, ‘n kâns te waoge vör ‘n rol inne musical dae op 17, 18 en 19 mei 2024 zal waere opgeveurdj.
Op 15 aprîl zal ‘n twieëdje auditie plaatsvînge woeëvör, naeve de zangtalênte di-j de ieërste ronde mét succes hebbe aafgesloeëte, ouch e gezelschap zêngers en zangeresse di-j inne productie ‘Graaf van Horne-de Musical’ ‘n rol spuuëldje, waere genuuëdj. Beej di-j auditie zal de bezétting vör ‘Antje-de Musical’ waere gekoeëze. Ouch daovör hieët Rob Mennen, dae zien enthousiasme vör de op hang zeendje productie beej de ieërste auditie neet oonger steul of bênk stoeëk, zien mejwêrking weer towgezagdj.
Op dieës website haoje vae uch oppe huuëgdje vanne ontwikkelinge
roontelum de musical.
